Azərbaycan xarici işlər naziri Ceyhun Bayramov Qəbələdə Türk Dövlətləri Təşkilatının XII Zirvə toplantısından əvvəl baş tutacaq TDT Xarici İşlər Nazirləri Şurası çərçivəsində türkiyəli həmkarı Hakan Fidanla görüşüb.

Mis.az xəbər verir ki, bu barədə Azərbaycan Xarici İşlər Nazirliyi məlumat yayıb.

Nazirlər Azərbaycan-Türkiyə qardaşlıq münasibətlərinin və hərtərəfli ittifaqının uğurla inkişaf etdiyini vurğulayıblar.

Görüşdə siyasi, təhlükəsizlik, müdafiə, ticarət, enerji və nəqliyyat sahələri üzrə müzakirələr aparılıb. TDT çərçivəsində həmrəylik və tərəfdaşlığın ən yüksək əhəmiyyət daşıdığı qeyd olunub.

Nazirlər həmçinin regional məsələləri və qarşılıqlı maraq doğuran mövzuları müzakirə ediblər.

Xarici işlər naziri Ceyhun Bayramov da türkiyəli həmkarı ilə görüşünə dair paylaşım edib.

"Qardaşlıq ittifaqımız və strateji tərəfdaşlığımız bütün sahələrdə güclənməyə davam edir", - deyə qeyd edən C. Bayramov bildirib ki, Azərbaycan və Türkiyənin Türk Dövlətləri Təşkilatı çərçivəsində əməkdaşlığı iki ölkə arasında tərəfdaşlığın dərinləşdirilməsi və birlikdə firavan gələcək qurulması baxımından əhəmiyyət kəsb edir.